الاثنين، 25 يناير 2010

قصه جميله....

كان يا مكان الوقت مو بعيد بالعكس قريب جدآ جدآ كان فيه بنت قاعده تلعب بالحوش أو المزرعه ...مايهم المهم أنها تلعب
وأهي تلعب بالديرفه فجأه هبت ريح قويه شلعت الأشجار وطيرت الغبار البنت من الخوف أنحاشت لبيتهم بس لقت الباب مسكر ومقفول والريح كل مالها وتشتد خافت البنت وقامت تبجي أشوي ولا يمر عليها اللاعب ميسي بالفراري مالته ونزل الكره وقام يشوت على درايش البيت واهو يشوت طلع له راعي البيت وقال حق ميسي يعني شلون ما نعرف أنام قاله ميسي وين ألعب كره ..؟ قاله روح ألعب بالحاره مع الأولاد الصغار ...رد ميسي وقال انا بروح الحمام الحين وبعدين يصير خير يمكن أروح اشرب جاي مع الربع وألعب هاند ولا بهند جيكر واهو راد البيت شاف محمد عبدو نوال الزغبي تتسوق بالافنيوز قال لها محمد عبدو ليش تمشين بالسوق انتي المفروض كل شي يوصل لي بيتكم قالت نوال الزغبي ولا انا مريضه ويايه اتسوق عشان ابي اطبخ مربين مع دقوس صبار اهنيه قال لها محمد عبدو واو عاد اتصدقين انا شبعان بس المربين من ايدج ما يتطوف خاصه اذا شويتيه بالفرن مع بطاط وبصل وطماط قالت نوال على طاري البطاط شفت امس مباراه الجزائر وساحل العاج الصراحه ريال مدريد ألعبوا تمام وفازوا على يوفنتوس ولا أنطرد بوفون قولجي كاظمه المهم رد عليها محمد عبدو وقال لا انا كنت احدق بالمطلاع وصدنا جربوعين وسحليه مادري شلون ياهم واحد من المعجبين وقال لهم ياسلام انا ما اشوفكم الا بالرادو بس احب اخذ توقيعكم عشان اوريه الاهل والاصدقاءنوال قالت اوكي ومحمد قال اوكي بس شرط ما تستعمل التلفون وانت تسوق السياره لانه انا شفتك بالشارع من سنه وانت تسوق وتتكلم بالتلفون..الاخ ضحك وقال انزين انا بروح الحين البس هدوم الرياضه عشان اسبح بالبحر
واهو طالع من غرفته شاف صينيه مالت الجاي اخذها ووداها المطبخ ولا امه تقوله هالصينيه خربانه روح صلحها قالها اوكي انا بوديها الكراج بشويخ عشان يسوي لها رجفه وسحقيه وعشان التواير مره ثانيه ما تبنجر بالطريج مثل كل مره ونروح الجمعيه نشتري دهن ودياي ولحم وغيره ..امه اسمعت الجمعيه قالت حق ولدها روح قوم اختك من النوم عشان اروح وياها السينما باجر بليل وروح عند القصاب واشتر شويه صابون عشان نغسل الهدوم الوصخه ولدها قالها انزين مع اني لابس وكاشخ عشان اروح العب كره قدم بخط السريع الي يودي الوفره ويمكن امر على ولد خالتي عشان نروح القهوه بعد شوي قالت الام اي زين تسوي انا بروح حق جارتنا عشان اطبخ بعد شوي ابوك واخوانك راح يوصلون من الدوام
الا اقول أحد فيكم فهم شي من القصه...؟
طبعا لا هذا الي راح نكتبه بالمدونات وهذا الي راح ينشر بالجرايد اذا وافقوا على قانون المرعى والممسوخ مال وزاره الاعلام
ودمتم سلامين

الأربعاء، 13 يناير 2010

قلمي ومدونتي وحريتي ...وفمي


كالعاده وبلا أي مقدمات قامت الحكومه بتقديم قانونها المسخ والمعيب بحق المرئي والمسموع بحجه الحفاظ على الوحده الوطنيه وبحجه الحفاظ على العادات ولتقاليد وعدم شق وفتق وحرق نسيج المجتمع الكويتي
كالعاده برهنت الحكومه بأنها لا تطيق الحريه ولا تحترم الدستور والود ودها أنها تحرق أي شئ فيه حريه للتعبير والنقاش الحر
حكومه تصدر قوانين على ردات فعل هذه حكومه مثلما قيل الهون ابرك ما يهون وخلونا نمشي تحت الساس لا يطيح علينا
وهي تعتقد بذلك بأنها ستحافظ على النسيج وثوب وبرقع وعباءه وبشت وغتره وعقال المجتمع الكويتي
هذه الحكومه التي هي من قام بتكريس الطائفيه والقبليه والعائليه تقوم اليوم بلوم الناس وانهم لا يعرفون اين المصلحه العامه
هذه الحكومه الخائفه من لحيه فلان وحنجره فلان تريد ان تكون ملكيه أكثر من الملك
حكومه لا تقدر ان تدافع عن مشاريعها فما بالكم بقوانينها وتتضايق اذا احد من عامه الناس انتقدها لذلك قامت بفرض احكام حتى قراقوش لا يصدرها
الحكومه حرام الضرب فيها لانها لاتسمع ولا تنطق ولا ترى
لكن الشرهه على من يصارخ بالمجلس والاماكن العامه الدستور والدستور ونراه لا يتكلم اليوم عن هذا القانون هل لان الحكومه وضعت فقره كل من يحقر من مجلس الامه مصيره الفناء؟؟
ايها الدستوريون الجدد انتم لا ترون من الدستور الا الاستجوابات وتشكيل الحكومه ولنا معكم تجارب كلجنه الظواهر السلبيه ومن وقع بسنه 1992 عل تعديل الماده الثانيه ومن صوت بقانون منع التعليم المشترك ومن ومن أنتم لا تحترمون الا رغباتكم انتم والحكومه واحد في وأد الحريات
ودمتم سالمين