الاثنين، 17 نوفمبر 2008

أفرح يا قلبي

بصراحه أنا فرحان على الوضع الي وصلنا له من تردي الأوضاع بالسياسه..
انا فرحان أن نوايب المجلس بدل ما يلتفتون لواجباتهم قاموا يزهبون السكاكين لرئيس مجلس الوزراء عشان واحد تافه دخل الكويت .. آسف جنه الكويت الخضراء..
عشان واحد سب الصحابه وتطاول على أله الرمال قامت الدنيا على روسنا والناس قامت تسولف مع أو ضد.. هنيالك يا الفالي صرت سبب لحل المجلس..
أفرح يا قلبي يوم كنت أسمع نوايب المجلس وكلامهم عن حب الوطن والوحده كنت أقول الصراحه تعرفون تجذبون على الأوأدم..
كل كلامهم تيش بريش.. هايف من كثر ماهو هايف مسوي ندوه ويايب أشرطه عن الفالي ويسمع الناس كلامه من على المنبر الحسيني..
أفرح يا قلبي .. حكومه راح تطير بدقايق عشانها كشفت من زمان لتيارات هايف والطبطبائي والصانع .. خبز خبزتيه يا الرفله أكليه..
بس لا تخافون ترى هالأوادم المتخلفين عسل على قلوب الحكومه..
أفرح يا قلبي ... عندنا رئيس حكومه ما يعرف يحمر العين على هالأشكال وخلي كل من هب ودب يخرعه باستجواب ماله لا طعم ولا لون..
والشرهه على الحكومه الي تقط مصايبها على بعضها البعض ..
أفرح يا قلبي ... سعر النفط نزل والحكومه للحين تفكر بالمصفاه الرابعه عشان جم تاجر يستفيد من الفلوس..
أفرح ياقلبي.. عندنا شعب نايم على اذانيه الي قامت بس تستوعب ما قاله اله الرمال وما قاله صلعم المتوفي من 1400 سنه..
أفرح يا قلبي .. أحنا بديره بخمس دقايق يتغير مزاج الشارع عشان البورصه نزلت ولا واحد مثل ما قلت تافه دخل الكويت وساس البلا الحكومه والنايب الي يابه ..
بس عندنا حكومه ما تعرف بالغلط لأنها معصومه من الغلط حالها حال الأنبياء..
أفرح ياقلبي حتى النواب ألي نتعشم فيهم الخير خافوا من التصريح بالموضوع عشان حسباتهم الأنتخابيه أما الديره بالطقاق ...
بالأخير راح أقولها وسأظل اقولها لا للكويت ألا بالعلمانيه الي يسمونها المتخلفين كفر ..
أذا كانت كفر وما نشوف هالمتخلفين أنا راضي فيها وقابل فيها ...
وعندي حل للنوايب الشيعه : مو السنه أحتجوا على دخول الفالي ؟؟ المره الثانيه أنتوا يا عاشور وربع عاشور قعدوا لهم قعده ولا يدخلون واحد من شيوخ الدين السنه وطلعوا اسباب من تحت اباطكم أذا تبون لأن الحجي ببلاش وتأكدوا أن الحكومه راح تخاف منكم لين مايدخل الديره...
وأخرتها نفتك منكم أنتوا الأثنين ونرتاح من طرحكم الديني الممل وألي أييب الحارج والقامت على القلب...

هناك 8 تعليقات:

AyyA يقول...

انا هم فرحانه
هد حيلهم بينهم

Mozart يقول...

اول شي حمدا لدارون على سلامتك

و ثانيا انا بعد مستانس لان كل هالمساجد اللي تارسه مناطق الكويت ما انقذتنا من الأزمات لذلك اتمنى أن يتم تحويلها الى مدارس و مراكز تعليميه و صحية

rai يقول...

انا بعد راضي لاكفر الي مايبونه على الاقل اشرف منهم .

guevara يقول...

ayya:
صح ألسانج فخار يكسر بعضه

mozart:
شفت شلون انا صارت عندي قناعه أن المسلمين يدعون بالخير يرد عليهم عايدي ماكو فايده فيهم

rai:
اخي العزيز التيارات الاسلاميه كلها تدري بقرار نفسها فشل الاسلام السياسي لكن يكابرون عشان لا تجرفهم العلمانيه المتسامحه

MaCHBoS يقول...

المساجد يا كثرها اتوقع صارت اكثر من البيوت و مثل ما قال عبدالحسين عبدالرضا حق ابراهيم الصلال بمسرحية هذا سيفوه و هذي خلاجينه لمن قال اسكت لا احول المسجد بار

لدرجة الكره فيهم هدموا كنيسه و بره لمن يبون يهدمون مسجد تقوم الدنيا و ما قعدت تبا لآله الرمال الغبيه

guevara يقول...

مجبوس:
راح يصير بالكويت مسجد لكل مواطن بس انا بعرف شغله هالعتوي الي ملبسه جماغ اشلون قدرت علييه؟؟؟؟

نادر الحر يقول...

مرحبا صديقي
**************
نتابع عبر الاخبار مايجري في الكويت
فعلا شي يدعوا للسخرية
هؤلاء الاسلاميين الاغبياء المسيطريين علي مجلس الامة نكبة علي الشعب الكويتي

تحياتي

guevara يقول...

نادر الحر:
أهلا بالزميل العزيز ما يدعو للسخريه يا عزيزي ان كل طرف يدعي انه حامي حمى الدين العتيق البالي والمظلوم في هذه المسأله هو العقل المسكين