الجمعة، 25 يوليو 2008

هاجر وأرتاح

ما أعرف من وين أبتدئ الموضوع... لأن بصراحه هناك من يتكلم بكل صراحه أنه يريد الهجره من الكويت..

ويتمنى لو تحصل هذه الفرصه اليوم قبل باجر..

أدري أنه الموضوع غريب وبنفس هناك من راح يقول أنت تبالغ بالموضوع..

بس بكل أمانه أعرف أكثر من واحد يراوده هذا الشعور ولما اسألهم عن السبب يكون الجواب متعدد الأسباب..

منها الحاله السياسيه بالكويت والفساد ألي كل يوم عن يوم يستشري بالبلد..

يتكلمون عن كبت الحريات الشخصيه والمدنيه للفرد ومباركه الحكومه لهذا الكبت الغير مبرر..

يتكلمون سوء الخدمات الموجوده بالوزارات .. الخدمات التعبانه بالمستشفيات والتعليم السيئ (أبشركم راح يمنعون الفلسفه بالمدارس)..

هذا غير الرشاوي ألي لازم الواحد يدفعها بالوزارات عشان يمشي معاملته مع أنها قانونيه...

بالأضافه ألى أداء بعض نوايب مجلس الأمه وتحريكهم للأزمات السياسيه...

قد يقول الواحد منكم هالشغلات موجوده من زمان ...

أقول نعم موجوده .. لكن كثرتها بالوقت الحالي زاد عن الحد المعقول لدرجه أنه المواطن قام يستغرب ولا يصدق أنه معاملته تنتهي بدقايق.

وهذا كله كوم ولمه يتكلمون بحسره عن عدم وجود أي مظهر من مظاهر التنميه..

لاطرق , لا مستشفيات مثل الناس, مدارس تعبانه, وفوق هذا وألي زاد الطين بله الكهربا والماي بكل صيف نحط أيدنا على قلوبنا خوفنا أنه تنقطع عنا الكهربا ولا الماي.. مو خبركم جونا أحنا بااااارد بالصيف مثل أوربا..

الصراحه لمه اسمع هالكلام منهم ما ألومهم لأنه الكل شايف الوضع من سيئ ألى أسوأ..

لكن السؤال ألي أوجهه لهم هل الحل بالسفر والهجره لبره الكويت؟

خاصه أنه راح تغترب عن أهلك وربعك ؟؟ سؤال منطقي ..

لكن أنصدم من الأجابه لمه أسمع أنه بهذا العصر التواصل صار أسهل وأيسر من قبل التلفونات والكمبيوتر والانترنت وغيره من وسائل التواصل .. اما الربع مثل ما نتصل على الاهل نتصل عليهم وثاني شي نكون صداقات بالخارج..

خاصه أنه الغالبيه يفكرون بالهجره لدول الخليج من منطق القرب بالمسافه للكويت ..

ولمه أسمع أحد هذه الدول أقول لهم الحال من بعضه بالكويت ولا غيرها من دول الخليج ..أنصدم من أجابتهم لمه يقولون لمه نسافر بره مالنا شغل بمشاكلهم نبي نشتغل وبس أما بالكويت قلبنا يحترق والسكر يرتفع على الفاضي..وأخرتها كله فشي ماكو شي راضي يتطور..

هذي بالامانه ألي قاعد يقولونه شباب الكويت بعد ما ضاقت بهم السبل وتسكرت البيبان بويهم من كل صوب..

بس سؤالي هل الهجره تحل المشاكل وتريح الناس من المشاكل الموجوده بالكويت؟؟؟؟




هناك 8 تعليقات:

مريم الموعذراء يقول...

شصار على مدونتك ؟

yoohoo~~ يقول...

خووش حجي يا اخي و الناس ملت من وين تلاقيها و لا شي بهالديرة صاحي ملينا من التحلطم قمنا ما نهتم باي شي يصير و نقول بلعنة يصير اللي يصير بس لاعت جبودنا.

UmmEl3yal يقول...

الهجرة خيار طبيعي مع تطور المجتمع وتعدد البدائل. كل الدول فيها مهاجرون ومهجرون لما تكون الكويت استثناءا؟

العوامل الطاردة كثيرة ولكن متاعب الهجرة قد تكون أكبر. لا يوجد حل مناسب للجميع. كل حسب ظروفه واحتياجاته وقدرة تحمله !

guevara يقول...

مريم الموعذراء:
بالنسبه لمدونه نواقيس الان هي مفتوحه لكن بالسابق اصحاب النفس الضيق ماتحملوا الجم بوست الي حطيته فاشتكوا على المدونه لكن صممت وفتحت هالمدونه عشان اقول رائي بكل صراحه ونواقيس خليتها احتياط بلعب وياهم توم وجيري :))

maow:
للاسف وصلنا لمرحله اللا مبالاه وهذا اخطر شي لدمار المجتمعات

ummel3yal
انا معاج انه الهجره لها متاعبها وبالنسبه انه ليش الكويت استثناء لسبب واحد فقط انه الكويت من ناحيه الدخل الفردي تعتبر دخل مرتفع واغلب الدول الي تعاني من الهجره هي الدول الفقيره لكن بالكويت الاستثناء انه الهجره بسبب الفساد وكبت الحريات يعني مو الهدف تحسين الوضع المادي للفرد مثل ما نشوف اخوانا الاجانب بالكويت ايي عشان يحسن من مستواه المعيشي بدولته

MaCHBoS يقول...

للأسف من بداية السنه السفاره الامريكيه تنشر ارتفاع في احصائية الصريحات الهجره الى الخارج الى 65% زياده عن 2007 يعني اللي طلعوا ما اتوقع راح يرتاحون لانه بالخارج في عنصريه ضد العرب اجمع !!

شباب روش طحن يقول...

أعتقد أن العمل من أجل تحسين حال الوطن أفضل بكتير من تركه والهجرة منه

Diagoras يقول...

I did give alot of thought about leaving kuwait to live in a country where i wouldn't fear death for being an atheist, to be honest no other country would respect outsiders, racism is still the trend even in the 21st century, and i totally agree with machbos.
i'd like to invite you and your dear readers to visit my newly formed blog, it's about presenting religious ideas in a humorous manner, all english all za time :)
thanks for the opportunity.

guevara يقول...

machbos:
كلامك صح عن التفرقه العنصريه بالخارج لكن مايمنع انه فيه هجره وبزياده بعد.

شباب روش طحن:
وأنا معاك بهذا الراي

diagoras:
للأسف الكويت صارت طارده لشبابها وكلامك عدل