الاثنين، 28 يوليو 2008

هي خاربه خاربه






كلكم اليوم فتح الجرايد وشاف البنغال وأهم محتجين على رواتبهم المتدنيه ....


والكل شاف أمس الأخبار والصور الحيه لتظاهره هؤلاء المساكين ... والكل شاف التخبط بالتصريحات بين مسؤليين وزاره الشئون ...


وأولهم الوكيل المساعد السيد حمد المعضادي ألي صرح بكل ثقه أنه هذه المظاهرات للمطالبه بزياده الرواتب ..


ونسى الأخ الوكيل المساعد انه هؤلاء الفقراء يطالبون بمعاشهم المنصوص عليه بالعقد ال 50 دينار... وألي رب العمل ينزله بالبنك كامل وبعدها بدقايق يقوم بسحب 30 دينار من كل حساب ...


بالذمه يا سيد الوكيل المساعد أنت بالكويت ولا مسافر بره مثل وزيرك ألي كان يدير الأزمه من بره وأهو قاعد على صخره الروشه بلبنان؟؟ وزير الشئون خل يحل مشاكل الطنباخيه عشان يقدر على شركات التنظيف...


وفوق هذا وذاك يطلع وكيل وزاره الشئون السيد محمد الكندري ويصرح بكل فخر أنه أجتمع مع السكرتير الأول بالسفاره البنغاليه ووعده بحل الأزمه بأسرع وقت؟؟؟


شي غريب الصراحه ما فهمت ليش الأجتماع مع السكرتير الأول بالسفاره وشنو دخله بالمشكله ؟؟


السفاره مو ملزومه أنه تدفع رواتبهم الملزوم بالدفع الشركات ألي تعرفها يا سياده الوكيل..
يعني للأسف كان أمس يبين مدي تخبط أركان الوزاره بحل هذه القضيه ألي أهم نفسهم سكتوا عنها لمراضاه فلان وفلنتان..

ويظهر أنه هالأوادم أقوى من وزاره الشئون بكبرها ألي بس نسمع ونقرى تصريحات ناريه بأنهم راح يحاسبون هذه الشركات أشد الحساب وأنهم راح يقدمونهم للنيابه بتهمه الأتجار بالبشر وأنه وأنه بس يظهر أنه كلامهم كله طاير بالهوى شاشي..

أما موقف الحكومه فلا يقل تخبط عن موقف وزاره الشئون ..

فالأخ سياده وزير الداخليه يصرح: لن نسمح لأحد بالمس من سياده الكويت ؟؟

أنا أول ما قريت عنوان التصريح قلت يمكن أيران ولا احد من هالتنظيمات الأرهابيه مهدد الكويت ويبي يسوي سالفه بالديره؟؟

بس يوم قريت التصريح لقيت سياده وزير الداخليه موجه خطابه للعماله البنغاليه ؟؟

هذا لابدل ان يقول الوزير سنحاسب من تسبب بالمشكله ومنع صرف رواتب العمال.. الصراحه مو شي يضحك ؟؟




بس للأسف وزير الداخليه مايدري عن حجم المشكله الي انفجرت أمس والصراحه ما ينلام أذا وزير الشئون مسافر والوكيل يجتمع مع أحد أركان السفاره والوكيل المساعد يقول العمال يبون زياده رواتب بدل لا يقول يطالبون براتبهم المكتوب بالعقد؟؟

لكن مره ثانيه ونصيحه مني لا يطلع أحد من الحكومه ويصرح ويعقب على منظمات حقوق الانسان لمه تتكلم عن تجاره الرقيق بالكويت والأضطهاد لهؤلاء المساكين .. بان هذا التقرير تلفيق وعاري عن الصحه وهدفه ضرب الكويت لمواقفها السياسيه الدوليه من آخر هالحجي ألي ماله لا طعم ولا ريحه والدليل أمس والقنبله ألي انفجرت وشلت الوزارات وصارت الممرات متروسه زباله وخلت المدير بجلاله قدره يروح للمطبخ عشان استكانه جاي ولا يسوي عصير أو يشرب ماي بعد ما كان معتمد على هالفقاره المساكين الي من حرتهم كسروا سيايير مسؤلين الشركه ألي ماصين دمهم ( مع أني ضد هالشي) لكن ما ينلامون يكرفون بالشمس ومصاصين الدماء يفتر عليهم بالسياره ومكيف وبالك بالك ويسجل عليهم مخالفات .. الي يسمع يقول معاش هالعامل 600 دينار عشان يسجل عليه مخالفه ..

بالنهايه ما أقول ألا هي خاربه خاربه...

هناك 13 تعليقًا:

haifa يقول...

عزيزي

الموضوع بكل اسف واضح مثل الشمس .. لكن لا يراها الامن يقدر الانسان ويرحمه ويحس به .. وبكل تأكيد لن يقدر الانسان الا من له مبادئ وعقل يفكر .. ولذلك نرى افرازات التلقين والمفلسين فكريا وحتى ادبيا بصياغة موضوع او مقالة عليها القيمة يقفون ضد هؤلاء المساكين .. لو قلنا الحكومة جبانه وماتقدر على الهوامير هذا شي مو يديد بس صاحبك ماغيره بو قال الله ورسوله شوف شنو كاتب
http://www.alaan.cc/client/pagedetails.asp?nid=17136&cid=47

واعتقد لن نزايد او نرد لان المعلقين على مقالته كفوا ووفوا

UmmEl3yal يقول...

نفس الموضوع عند حمد
http://sandoog.blogspot.com/2008/07/blog-post_28.html


مشكلة عندما تصبح الضحية هي الهدف! ربنا لا تؤاخذنا على ما فعل السفهاء منا !

MaCHBoS يقول...

اعتقد الشؤون تدلع الشركات (الكبرى) التي تتاجر بالبشر و قلعت الشؤون ما راقبت الشركات الحين وصلني خبر دشوا على بيوت الناس و كسروا سياييرهم !!

Hamad Alderbas يقول...

كان هناك من يتحدث عن كل هذه المشاكل

وكان هناك من كان يحذر من تفاقهم هذه المشاكل

وصلنا اليوم الى هذا الوضع المأساوي

فظلم الانسان طفح بالكويت

haifa يقول...

http://www.alamalyawm.com/articledetail.aspx?artid=55304

لوكان ساكت اشرف له .. تناقض اقل مايقال عنه غبي .. يضع كل الحمل على الضحايا البسطاء ثم يرقع اليوم بانه ضد الحكومة والتجاااار .. بالله احنا شكنا نقول ياكويتب درجة عاشرة .. المضحك بترقيعته بانه حين حمل التجار حملهم مسؤولية جلب فراشين وزبالين من بنغلاديش .. بذمتك يا فلته زمانك منو بيرضى بهالحال غير من كانوا بهالمستوى .. مادري الحبيب يبي نستورد زبالين من كوريا الجنوبية او اليابان مثلا..

قلناها ونعيدها افلالالالالاس وضعف حجة.. فعلا اثبت بانه مصخرة المدونات

guevara يقول...

haifa:
قريت المقالتين للكويتيب والاخ للحين امصمم انه البنغال هم اساس المشكله مو التجار

ummel3yal:
آآآمين

machbos:
الشئون خل يعرفون وين اله حاطهم عشان يحلون ولا يقفون بوجه الكبار (الشق عود)

حمد:
للأسف الحكومه كله على بالها كلام الناس خرطي وبالاخير يطلع كلامها اهي الي خرطي

yoohoo~~ يقول...

اذا تبي اساس المشكلة دوّر على راسها و اللبيب بالاشارة يفهم.

على فكرة الاغنية رائعة :)

guevara يقول...

maow:
ساس المشكله ألي معتبرين روحهم فوق القانون ومحد قدهم والكل عارفهم
اما الاغنيه فهي لزياد الرحباني وانا سعيد انها اعجبتك
:)))))

AyyA يقول...

اولا مبروك علي رجوع مدونتك
ثانيا مو جايني حجي، الديره كلها ماشيه علي كف عفريت، فخليها علي اللات و العزي و مناه الاخري لعل و عسي٠

guevara يقول...

ayya:
يبارك فيك :)))
ثاني شي أنا ما أؤمن بالعفاريت عشان الديره تمشي على كفهم
وثالث شي ليش نسيتي نائله وأساف تراهم خوش اوادم:)))

AyyA يقول...

كل شئ و لا نائله و اساف، الزنا في الكعبه حرام
p:

BLonDDyKe يقول...

BANGALY SAYING:

THIS

IS

!!SPARTAAAAAAA

ههههههه ما تحملتها هههههه
والله جنهم صايرين جذي لوول

guevara يقول...

ayya:
صح نسيت ان الزنا حرام

مثليه ولي الفخر:
كان ناقص يقولون هجوووووووم مثل المسلسلات العربيه