الأحد، 24 أغسطس 2008

بوست رياضي

اليوم أنتهت أولمبياد بكين وبصراحه أستمتعنا بالألعاب الفرديه والجماعيه..

وأستمتعنا بالأبطال ألي حققوا أنجازات لدولهم ولنفسهم وحطموا أرقام قياسيه حتى سميت دوره بكين بدوره كسر الأرقام...

منو فينا ما تابع السباحه الجمباز ألعاب القوى والطائره وعشان ما نبخس حق رياضه معينه أنا حاولت انه أتابع كل الرياضات حتى رمي السهم تابعتها..

منو فينا ما أعجب بالتنظيم والدقه بالمواعيد للدوله المنظمه وتجنيدهم لمليون شخص عشان يساعدون الرياضيين سواء بالقريه الأولمبيه أو بميدان السباق..

الصين خذت المركز الأول بالذهب وامريكا نافستها بالذهب.. وهناك دول حسنت من مراكزها لتثبت أنها دول تحترم تاريخها وتريد كسب أحترام الدول الثانيه وعرفت كيف تصرف فلوسها على رياضات كسبت منها الذهب أو الفضه أو البرونز..

دول من الأن قامت تستعد لدوره ألعاب لندن التي ستقام بسنه 2012..

وقبل لا أختم أقول لا عزاء للرياضه الكويتيه الميته أساسآ من زمان من يوم دخلوا علينا ألي مايفرق بين السباحه وكره الماء ..

من يوم صارت الرياضه عندنا لكسب الولاءات وشراء الذمم للانتخابات ..

من يوم صارت الرياضه عندنا مجنده كلها بالكامل لنادي حولى .. أذا رضى رئيس نادي حولي قامت الانديه الأمعه تصفق وتهلل لسيادته..

من يوم صار مدير الهيئه يطبل ويسترضي فلان وفلنتان عشان رئيس نادي حولي يرضى عنه ويخليه بمنصبه وفوق هذا يستأذن منه أذا يسوي مقابله ولا لأ ؟؟

من يوم ما صارت الرياضه عندنا تندار من الأسطبلات والجواخير عشان يحددون منو يدش ومنو يطلع من الأتحاد؟؟

من يوم ما صارت الرياضه عندنا أذا اللاعب أييب قوول ولا يحرز ميداليه ايلبسها لمعالي الشيخ ويقول اللاعب كله بفضل وجهد سيادته ؟؟

من يوم ماصارت الرياضه عندنا ينافقون لها بالجرايد ولا يتكلمون عن الخمال ألي تارس الأتحادات لانهم ربع رئيس نادي حولي..

من يوم ما طلع لنا الأخ ويقول : حان وقت الحصاد ببكين .. قلت بقلبي خلك ساكت أحسن ..

الأخ ما يشوف الناس شيسوون عشان يبرزون بطل من أبطالهم وشلون يتعبون عليه بالسنوات..

بالأخير ما أقول ألا كانت في قديم الزمان شي أسمه الرياضه الكوتيه..

هناك 12 تعليقًا:

Mozart يقول...

مشكله الرياضه عندنا سببها الاداريين الكويتيين التي اعمارهم في أواخر الاربعينيات و الخمسينيات , فاغلبهم من الفاشلين دراسياو لم يتخطو التعليم المتوسط و حصلو على مناصبهم بسبب الشواغر و توفر الفرص في زمنهم , و هم لا يجيدون سوى تقبيل مؤخرات الشيوخ , هؤلاء بحاجه الى غربله و احالتهم عالمعاش و استبدالهم بعقليات حرفيةو حملة شهادات عليا

MaCHBoS يقول...

الواسطه و ما ادراك للواسطه !!

اللي يعرف يلعب قعدوه احتياط و اللي يتشيحط بالجيل و يروح يحذف ورد عند مدرجات العوائل يخلونه يلعب للأسف لازم يعيدون تسميت الاتحاد حق هيئة الشباب و البيروقراطيه

rai يقول...

ههههههه لو ساكت احسن له :)

التنظيم والادارة هي ماتفتقر لها الدولة بكاملها كيف هذا واهم وزارة لديها والمتمثلة بالتخطيط قد الغيت واصبحت تحصيل حاصل فالدولة في تخبط سكران مخدر لايعي ماحوله ولا يقدر على حمل نفسه , اما في الرياضة قد غرقت في مستنقع التنفيع والمحسوبية ونظام الشليلة وماترتب عليه ابتعاث 7 لاعبين و42 اداري للاولبياد المخصصة للاعبين وليس الادرايين :)

zaradacht يقول...

mozart:
قلتها يا اخوي الرياضه الان اصبحت علم وربعنا للحين ما يعرفون الفرق بين النتس الطاوله والريشه. وجان زين يعرفون ينافقون كله بالشلوت من معالي الشيخ رئيس نادي حولي ويردون عليه شلوتك يدفعنا للأمام طويل العمر

machbos:
راحوا الرياييل للاسف وتحذف الورد على المدرجات عشان ماما نعيمه ترضى عليهم وتقول ياحلوه خوش ولد

rai:
احنا على ايام وزاره الطيط ما فلحنا تبي هالمره بدون وزاره الطيط بس الي تم .....طيط

المنافق يقول...

زرادشت..
أرحب بنفسي في مدونتك أولا..لا أدري أحسست بشعور اني في بيتي..فرفعت الكلفة

موضوع الأولامبيات وعلاقتها بالدول الاسلامية والعربية/هذا أصلا ان كانت توجد علاقة بين الاسلام والرياضة..
شعب لا يزال يحتقر هده الرياضات وكل ما فيه تعرية العضلات باعتبارها عورات كيف يمكن أن يشجع مثلها رياضات..
شعوب تنخرها الفوضى والسلوكات اللاأخلاقية النفاقية بمعنى النفاق الحقيقي..لا يمكن أن تحقق شيئا في الرياضة..
تحياتي على الموضوع الدي جاء في وقته

blacklight يقول...

الإخفاق الرياضي سببه العقليه التي ترى الرياضه واجهه إجتماعيه وأداة للتكسب السياسي.
لاحظ مداليات الأولمبياد فقط الدول المتميزه والمنظمه استحقت الصداره , فالرياضه كباقي الأمور هي انعكاس لتحضر المجتمع وتقدمه.

lwatan-ajmal يقول...

ده كان زمان وجبر يا خووويا :)

zaradacht يقول...

منافق:
حياك ولا تخلي الكلفه بالعكس خلك ريلاكس
اما الاسلام والرياضه فشتان بين الاثنين


بلاك نايت:

احنا الرياضه عندنا مثل ماقلت للترزز وجان زين فالحين فيه بعد

lwatan-ajmal:
ايييييه يبتها ييب

Maow يقول...

طول ما هم رابطين الاسلام بكل شي الديرة ما راح اطلع احد يمثلها و تفتخر فيه يدام العالم بكبره

zaradacht يقول...

maow:
المشكله بالاسلام الي يحرم كل شي ولا العقليات تجيبها منين ولا منين

مكان للعبث يقول...

شكرا لتعليقك!اذ سرني فعلا!

مــعـــارض يقول...

رئيس نادي حولي... قصدك رئيس نادي اسطبل الشهيد! p:

نادي القادسية "المحتل" من قبل اسطبل الشهيد... سيتم تحريره قريباً!
كل التوفيق والنجاح لقائمة أبناء النادي، "أصل" القلعة الصفراء :)



أي رياضة كويتية أي بطّيخ، في ظل قيادة ترعى مهرجان مزايين الإبل لاختيار ملكات الجمال! وتعتبره من العادات الكويتية الأصيلة!!!