الخميس، 28 أغسطس 2008

هذول نوايب الهم والغم


هذول مجموعه من نوايبنا ألي أبتلينا فيهم ..

وهذول ألي قاعدين يشرعون لنا القوانين ويتحكمون بحياتنا وتدخلون بخصوصياتنا...

هذا محمد هايف ألي يشوفه يقول متمضمض بالبتكس لأنه عدو الأبتسامه

وهذا وليد الطبطبائي نايب الدائره الثالثه وسابقآ كان يسمى بكيفان قنفذ كيفان

وهذا علي العمير: أقدر اقول عنه أنه فلته زمانه..












وهذا ضيف الله بورميه:دخل أنتخابات فرعيه بطريقه غير مباشره..






وهذا جمعان الحربش: بدواوين العنوز يصير عنزي ودواوين المطران مطيري؟؟
وهذا عبداللطيف العميري: على باله للحين قاعد بمجلس جمعيه القادسيه الي مو عاجبه يطرده..
وهذا بعد ما يحتاج خالد السلطان: يبي يطبق الشريعه علينا وأهو مو قادر على بيته؟؟

وهذا محمد الكندري: ما أقول ألا أنت وين والمجلس وين...

بس ليش أحنا ساكتين عنهم قايمين يتفلسفون علينا وخلونا دوله منحله اخلاقيآ ويبون يحافضون على عيالنا من الضياع والأنحراف؟؟

انا أقول لهم شوفوا مصالح زعيمكم بو وليد وسالفته مع المصفاه الرابعه أبرك لكم ...

وأما نوايب الباجين فحافظوا على راس العليم لا يطير منكم بعدين تلجونا وتقولون أنه هناك طائفيه ومادري شنو..

بس يلا الشرهه مو عليكم الشرهه على ألي عطاكم صوت وعلى الحكومه ألي تسمع لكم..

هناك 10 تعليقات:

MaCHBoS يقول...

الطبطبائي شكله يخرع بالصوره !!

أتوقع بداية السنه اليايه حل مو طبيعي و يرشح النواب المتأسلمين و ياريت لو تطلع ماده بالدستور ممنوع انتخاب رجال الدين لووول نصير علمانيه و نفتك من هالارهابيين

غير معرف يقول...

يحليلها صورة الطبطبائي صج سيماهم في وجوههم
p;

Ω Suki Candy Ω يقول...

محمد هايف انسان ذو انفصام شخصية؟؟ مو صج

طبطبائي يماااااااا شنو هالصورة تخرع امبيه يخرعون فيها اليهال اذا ماسمعو كلام امهم ولا ابوهم

العمير ؟؟؟؟؟؟؟؟؟؟؟ لاتعليق

بورمية صج بورمية رماها صح ودش المجلس بطريقه ترماويه

الحربش يذكرني اب قصص عالمية منو يذكر القصه عن الخفاش بيصير مع الطيور و بيصير مع ذوات الاربع اقدام يتشكل بالصوبين ويتكيف او يكيف نفسه بسرعه . . . شاكه فيه أحم

العميري شنو تتوقع واحد طول عمرة بمجلس جمعيه لي مجلس امه فرق شااااااسع بلمجال

خالد بن السلطان بصراحه ماسمع له حس عكس نجم ستار لظس هايف الي متهم اب قضية اخلاقية الي يبون يسوون فتنه دينية داخل الديرة اذا ماحطو لهم حد سلم على الديرة وعلى الدستور

الكندري هذا دكتور عيون شكوووووووووووو داش المجلس لو ظل اب مكانه احسن

guevara يقول...

machbos:
من متى الطبطبائي صار شكله حلو؟؟
وشكلها مثل ماقلت سنه يديه حاره على النواب

حمودي:
صدقت يا الغالي سيماهم على وجوههم

tranquility:
لووول
أعجبتني مالت الحربش انه يتشكل طلعتي منتي هينه حيلج فيهم
:))))

راعي تنكر يقول...

وهذا بعد ما يحتاج خالد السلطان: يبي يطبق الشريعه علينا وأهو مو قادر على بيته؟؟

عجبتني



بس يلا الشرهه مو عليكم الشرهه على ألي عطاكم صوت

بس هذي ما عجبتني

تهقى ليش الناس صوتت لهؤلاء؟
الجواب بسيط وسهل
لان ماكو بديل ناجح
لان ماكو بديل افضل منهم
لان بغياب هؤلاء سيحدث عندنا فراغ

اجاباتي على السؤال السابق بنيتها على الافتراض التالي:
بما اننا نعترض على التيار الديني جملة وتفصيلا
اذن نحن نسعى الى ابداله بتيار علماني
وللاسف نحن نفتقد هذا التيار
تيار وليس افراد كل هائم في طريق

عزيزي الطبقة السياسية الحالية بالكويت دينية 100%
من جمعية احياء التراث مرورا بحدس والجماعات الشيعية والتكتل الشعبي وصولا الى التحالف
صدقني كلها دينية

guevara يقول...

راعي التنكر:
كلامك عين العقل كل التجمعات السياسيه عندنا دينيه ولا ربعنا التحالف ينافسون الجمعيات الاصوليه بتشددهم الديني عشان الناس لايقولون عنهم علمانيين . يبون الكرسي يا ولد عمي

مكان للعبث يقول...

ادعوكم لمطالعة مدونتي "مكان للعبث".
وسأسعد لقراءة تعليقاتكم عليها.
http://makanabath.blogspot.com

Mozart يقول...

قالها نوافكو مرة بأن كل من يوافق على المادة الثانية من الدستور هو متأسلم , لذلك ليس هناك فرق بين هؤلاء و بين حليق الذقن الذي صوت لهم .

guevara يقول...

مكان للعبث:
نتشرف فيك ويسعدنا انه نطلع على مدونتك ولنا الشرف

mozart:
صدقت البلوى في الي يدعي الليبراليه ويروح يصوت لهم ولا يشتغل معاهم عشان يضمن حسن الخاتمه

مــعـــارض يقول...

هؤلاء هم الظواهر السلبية والدخيلة على مجتمعنا "الكويتي"!...

لا للدولة الدينية، ونعم للدولة المدنية